ಹ್ಯಾಚ್ ಫೆಬ್ರೆರ್ 26ವೆರ್ ಫುಡಾರ್ ಪ್ರತಿಶ್ಟಾನಾಚ್ಯಾ ಆಸ್ರ್ಯಾಖಾಲ್ ‘ಪ್ರತಿಭಾ ಪುರಸ್ಕಾರ್ 2016’ ಕಾರ್ಯೆಂ ಮಂಗ್ಳುರ್ ಮಿಲಾರ್ ಹೊಲಾಂತ್ ಚಲ್ಲೆಂ. ಮಂಗ್ಳುರ್ ತಶೆಂ ಉಡುಪಿ ದಿಯೆಸೆಜಿಚ್ಯಾ ಎಸ್ಸೆಸ್ಸೆಲ್ಸಿ, ಪಿಯುಸಿ ಆನಿ ಪದ್ವಿ-ಸ್ನಾತಕೋತ್ತರ್ ಪದ್ವಿ ಶಿಕ್ಪಾಂತ್ ಉಂಚಾಯ್ ಜೊಡ್‍ಲ್ಲ್ಯಾಂಕ್ ಹ್ಯಾ ಸಂದರ್ಬಿಂ ಸನ್ಮಾನ್ ಕೆಲೊ.
ಮಂಗ್ಳುರ್ಚೊ ಗೊವ್ಳಿಬಾಪ್ ಅ|ಮಾ|ದೊ| ಲುವಿಸ್ ಪಾವ್ಲ್ ಸೊಜಾನ್ ಕಾರ್ಯೆಂ ಉಗ್ತಾಯ್ಲೆಂ. ಆಪ್ಲ್ಯಾ ಉಗ್ತಾವ್ಣೆ ಉಲವ್ಪಾಂತ್ ತಾಣೆ ಸನ್ಮಾನಿತ್ ವಿದ್ಯಾರ್ತಿಂನಿ ತಾಂಕಾಂ ಮಾನ್ ಕೆಲ್ಲೆ ಸಮಾಜೆಕ್ ವಿಸರ್ನಾಸ್ತಾಂ, ಫುಡೆಂ ಚಡಿತ್ ಉಂಚಾಯ್ ಆಪ್ಣಾವ್ನ್ ಸಮಾಜೆಂತ್ ಪರ್ಜಳಾಜೆ ಮ್ಹಣ್ ಉಲೊ ದಿಲೊ.
.jpg)
.jpg)
ಆಮ್ಚ್ಯಾ ಯುವಜಣಾಂನಿ ಸ್ಪರ್ದಾತ್ಮಕ್ ಪರೀಕ್ಶಾ ಫುಡ್ ಕರ್ನ್ ಸರ್ಕಾರಿ ಸೆವೆಥಂಯ್ ಆಕರ್ಶಿತ್ ಜಾಯ್ಶೆಂ ಕರುಂಕ್ ವ್ಹಡಿಲಾಂನಿ ಪೆಚಾಡಿಜೆ ಮ್ಹಣ್ ತಾಂಣಿ ಉಲೊ ದಿಲೊ.
ಕಾರ್ಯಾಚೊ ಪ್ರಧಾನ್ ಉಲವ್ಪಿ ಜಾವ್ನ್ ಸರ್ಕಾರಿ ವಕೀಲ್ ಜುಡಿತ್ ಒ.ಎಂ. ಕ್ರಾಸ್ತಾ ಹಾಜರ್ ಆಸ್‍ಲ್ಲೊ. ತೊ ಆಪ್ಲ್ಯಾ ಉಲವ್ಪಾಂತ್ ಸರ್ಕಾರಿ ಸೆವೆಕ್ ಆಮ್ಚ್ಯಾ ಯುವಜಣಾಂನಿ ವೆಚಿ ಗರ್ಜ್ ವಿವರಾವ್ನ್ “ಭುರ್ಗ್ಯಾಂಕ್ ಫುಡೆಂ ಕಸಲಿ ವಾಟ್ ಧರಿಜೆ ಮ್ಹಳ್ಳೆವಿಶಿಂ ಸಾರ್ಕಿ ಜಾಣ್ವಾಯ್ ಆಸನಾ. ವ್ಹಡಿಲಾಂನಿ ತಾಂಕಾಂ ಹ್ಯಾ ವಿಶಿಂ ಜೊಕ್ತೆಂ ಮಾರ್ಗದರ್ಶನ್ ದೀಜೆ. ಸ್ಪರ್ದಾತ್ಮಕ್ ಪರೀಕ್ಶೆಕ್ ಜೊಕ್ತಿ ತಯಾರಾಯ್ ಕರ್ನ್, ತಿ ಬರವ್ನ್, ಸರ್ಕಾರಿ ಹುದ್ದೆ ಆಪ್ಣಾಯ್ಜೆ” ಅಶೆಂ ಮ್ಹಣಾಲೊ.
“ಆಮ್ಚೆ ಸಮಾಜೆನ್ ದೇಶ್ ಭಾಂದುನ್ ಹಾಡುಂಕ್ ಜಾಯ್ತೆಂ ಕಾಮ್ ಕೆಲಾಂ. ಆಮ್ಚೆ ಜಾಯ್ತೆ ಮ್ಹಾಲ್ಘಡೆ ಭುಂಯ್, ವಾರ್ಯಾ ಸಯ್ನ್ ಆನಿ ಉದ್ಕಾ ಸಯ್ನಾಂತ್ ಅಧಿಕಾರಿ ಜಾವ್ನ್ ವಾವುರ್ಲ್ಯಾತ್. ಹೆರ್ ಸರ್ಕಾರಿ ಸೆವೆಂತ್‍ಯಿ ಜಾಯ್ತೆ ವಾವುರ್ಲ್ಯಾತ್. ಪುಣ್ ಆತಾಂ ತೆ ನಿವೃತ್ ಜಾಲ್ಯಾತ್. ಆಜ್ ಆಮ್ಚಿ ಭುರ್ಗಿಂ ತಸಲ್ಯಾ ಖಂಚ್ಯಾಯಿ ಹುದ್ದ್ಯಾಕ್ ಪ್ರೇತನ್ ಕರ್ಚೆಂ ದಿಸೊನ್ ಯೇನಾ” ಮ್ಹಣ್ ತಾಣೆ ಖಂತ್ ಉಚಾರ್ಲಿ.
ಸವ್ಯಾ ಚಡ್ತಿಕ್ ಜಿಲ್ಲಾ ನ್ಯಾಯಾಲಯಾಂತ್ ಸೆವಾ ದಿಂವ್ಚ್ಯಾ ಜುಡಿತ್ ಎಂ. ಕ್ರಾಸ್ತಾನ್ ಆಪ್ಲ್ಯಾ ಉಲವ್ಪಾಂತ್ ಕ್ರಿಸ್ತಾಂವ್ ಚಲಿಯಾಂನಿ ಫುಡ್ ಕರ್ಚ್ಯಾ ಗಂಭೀರ್ ಸಮಸ್ಯಾವಿಶಿಂ ಉಜ್ವಾಡ್ ಫಾಂಕಯ್ಲೊ.
“ಹಾಂವ್ ಜಾಯ್ತ್ಯಾ ಲೈಂಗಿಕ್ ಶೋಶಣಾಚ್ಯೊ ಕೇಜಿ ಹಾತಿಂ ಘೆತಾಂ. ಅಸಲ್ಯಾ ಕೆಜಿಂನಿ ಕ್ರಿಸ್ತಾಂವ್ ಯುವಜಣ್ ಭೋವ್ ಉಣ್ಯಾ ಸಂಕ್ಯಾನ್ ಮೆತೆರ್ ಜಾತಾತ್. ಪುಣ್ ವ್ಹಡಾ ಸಂಕ್ಯಾಚ್ಯೊ ಕ್ರಿಸ್ತಾಂವ್ ಚಲಿಯೊ ಅಸಲ್ಯಾ ಸಮಸ್ಯಾಂಕ್ ಬಲಿ ಜಾತಾತ್. ಹಿ ವರ್ತ್ಯಾ ಬೆಜಾರಾಯೆಚಿ ಗಜಾಲ್.
ಆಮ್ಚ್ಯೊ ಚಲಿಯೊ ಜಿಣಿಯೆಚ್ಯಾ ಮಹತ್ವಾಚ್ಯಾ ಪಾಂವ್ಡ್ಯಾರ್ ಚೂಕ್ ನಿರ್ದಾರ್ ಘೆತಾತ್. ವ್ಹಡಿಲಾಂನಿ ಚಲಿಯಾಂಕ್ ಸ್ವಾತಂತ್ರ್ ದೀಜೆ ಪುಣ್ ತಾಂಣಿ ಸಾರ್ಕೆ ವಾಟೆನ್ ಚಲ್ಚೆಬರಿ ಪಳೆಂವ್ಚಿ ಜವಾಬ್ದಾರಿ ಘೆಜೆ” ಅಶೆಂ ತಾಣೆಂ ಉಲೊ ದಿಲೊ.
ಕಾರ್ಯಾಕ್ ಸಯ್ರೊ ಜಾವ್ನ್ ಹಾಜರ್ ಜಾಲ್ಲ್ಯಾ ಮಂಗ್ಳುರ್ ದಕ್ಶಿಣ್ ಕ್ಶೇತ್ರಾಚೊ ಶಾಸಕ್ ಮಾನೆಸ್ತ್ ಜೆ.ಆರ್. ಲೋಬೊನ್ ವರ್ಸಾವಾರ್ ಪ್ರತಿಭಾನ್ವಿತ್ ವಿದ್ಯಾರ್ತಿಂಕ್ ಮಾನ್ ಕರುಂಕ್ ವಾಂವ್ಟ್ ಕಾಡ್ಚ್ಯಾ ಫುಡಾರ್ ಪ್ರತಿಶ್ಟಾನಾಚ್ಯಾ ಮಾನೆಸ್ತ್ ಜೊನ್ ಡಿಸಿಲ್ವಾ ತಶೆಂ ಹೆರ್ ಕಾರ್ಬಾರ್ಯಾಂಕ್ ಶಾಭಾಸ್ಕಿ ಪಾಟಯ್ಲಿ.
“ಹ್ಯಾ ಭುರ್ಗ್ಯಾಂಕ್ ಫಕತ್ ಸನ್ಮಾನ್ ಕೆಲ್ಯಾರ್ ಪಾವನಾ. ತಾಂಣಿ ಐಎಎಸ್, ಕೆ.ಎ.ಎಸ್ ವಾ ಹೆರ್ ಸರ್ಕಾರಿ ಹುದ್ದ್ಯಾಂಕ್ ಪಾಂವ್ಚ್ಯಾಕ್ ಜೊಕ್ತಿ ತರ್ಬೆತಿ ದಿಂವ್ಚೊ ಸಂಸ್ಥೊ ಸ್ಥಾಪನ್ ಕರುಂಕ್ ಪೂರಕ್ ವಾತಾವರಣ್ ನಿರ್ಮಾಣ್ ಜಾಯ್ಜೆ” ಮ್ಹಣ್ ಸಾಂಗ್ಲೆಂ.
“ಎಪಿಜೆ ಅಬ್ದುಲ್ ಕಲಾಮಾನ್ ತಾಚ್ಯಾ ಹರ್ಯೆಕಾ ಭಾಶಣಾಂತ್ ‘ತುಮಿ ಸಪ್ಣೆಯಾ’ ಮ್ಹಣ್ ಉಲೊ ದಿಲಾ. ಪುಣ್ ಆಯ್ಚಿಂ ಭುರ್ಗಿಂ ಎಕ್‍ಚ್ ಪಾವ್ಟಿಂ ಗ್ರೇಸ್ತ್ ಜಾಂವ್ಚಿಂ ಸಪ್ಣಾಂ ದೆಕ್ತೇ ಆಸಾತ್. ಹಾಕಾ ಭುರ್ಗಿಂ ಕಾರಣ್ ನ್ಹಯ್. ವ್ಹಡಿಲಾಂನಿ ತಾಂಚೆಥಂಯ್ ತಸಲಿ ಮನೋಸ್ಥಿತಿ ರುತಾ ಕೆಲ್ಯಾ. ಭುರ್ಗ್ಯಾಂನಿ ವಿದೇಶಾಂತ್ ವಾವ್ರ್ ಕೆಲ್ಯಾರ್ ಆಮ್ಚ್ಯಾ ಭುರ್ಗ್ಯಾಂಚೊ ಫುಡಾರ್ ಭದ್ರ್ ಜಾಲೊ ಮ್ಹಳ್ಳೆಂ ಚಿಂತಪ್ ಆತಾಂ ಆಮ್ಚ್ಯಾ ವ್ಹಡಿಲಾಂಥಂಯ್ ಬಳ್ ಜಾಲಾಂ.
ಆಮ್ಚೆಥಂಯ್ ಸಮರ್ಪಿತ್ ಮನೋಭಾವ್ ಆನಿ ಪಯ್ಸಾದೀಶ್ಟ್ ನಾ. ಸೊಸ್ಣಿಕಾಯ್ ನಾಂಚ್ ನಾ. ದೆಕುನ್ ಆಮ್ಕಾಂ ಸರ್ವ್ ವೆಗಿಂಚ್ ಮೆಳಜೆ ಮ್ಹಣ್ ಆಶೆತಾಂವ್. ಉಂಚಾಯೆಕ್ ಪಾವೊಂಕ್ ತಶೆಂಚ್ ಸಮಾಜ್ ಸದೃಢ್ ಜಾಂವ್ಕ್ ಸೊಸ್ಣಿಕಾಯ್ ಗರ್ಜ್. 31 ವರ್ಸಾಂಚ್ಯಾ ಸೊಸ್ಣಿಕಾಯೆಚೊ ಆನಿ ವಾಂವ್ಟಿಚೊ ಫಳ್‍ಚ್ ಆಜ್ ಮ್ಹಾಕಾ ಮೆಳ್‍ಲ್ಲೆಂ ಎಮ್.ಎಲ್.ಸಿ ಸ್ಥಾನ್ ಮ್ಹಣ್ ತಾಣೆ ಆಪ್ಲ್ಯಾ ಜಿವಿತಾಚೆಂ ಉದಾಹರಣ್ ದಿಲೆಂ.
ಪ್ರತಿಶ್ಟಾನಾಚೊ ಅಧ್ಯಕ್ಷ್ ಜೊನ್ ಡಿಸಿಲ್ವಾ, ಖಜಾನ್ದಾರ್ ಎಲ್‍ರೊಯ್ ಕಿರಣ್ ಕ್ರಾಸ್ತಾ, ಕಾರ್ಯದರ್ಶಿ ಎಲ್‍ಜೆ ಫೆರ್ನಾಂಡಿಸ್, ಮಿಲಾರ್ ಫಿರ್ಗಜ್ ವಿಗಾರ್ ಮಾ|ಬಾ| ವಲೇರಿಯನ್ ಡಿಸೋಜಾ, ಮಂಗ್ಳುರ್ ಶ್ಹೆರ್‍ಆಡಳ್ತ್ಯಾಚಿ ಮೇಯರ್ ಜಸಿಂತಾ ವಿಜಯ್ ಆಲ್ಫ್ರೆಡ್ ಆನಿ ಹೆರ್ ಮಾನೆಸ್ತ್ ವೆದಿರ್ ಹಾಜರ್ ಆಸ್‍ಲ್ಲೆ.
ಕ. ಸಭಾ ಮಂಗ್ಳುರ್ ಪ್ರದೇಶ್ ರಿ. ಹಾಚಿ ಅಧ್ಯಕ್ಷಿಣ್ ಮಾನೆಸ್ತಿಣ್ ಫ್ಲೇವಿ ಡಿಸೋಜಾ, ಕ. ಸಭಾ ಉಡುಪಿ ಪ್ರದೇಶಾಚಿ ಕಾರ್ಯದರ್ಶಿ ಮಾನೆಸ್ತಿಣ್ ಮೇರಿ ಡಿಸೋಜಾ ಮುಕೆಲ್ ಸಯ್ರಿಂ ಜಾವ್ನ್ ಹಾಜರ್ ಆಸ್‍ಲ್ಲಿಂ.
ಪ್ರತಿಶ್ಟಾನಾಚೊ ಖಜಾನ್ದಾರ್ ಮಾನೆಸ್ತ್ ಎಲ್‍ರೊಯ್ ಕಿರಣ್ ಕ್ರಾಸ್ತೊನ್ ಪ್ರಸ್ತಾವನ್ ಭಾಶಣ್ ಕೆಲೆಂ ಆನಿ ಯೆವ್ಕಾರ್ ಮಾಗ್ಲೊ. ಗೊವ್ಳಿಬಾಪಾಂನಿ ಪ್ರತಿಭಾನ್ವಿತ್ ಭುರ್ಗ್ಯಾಂಕ್ ಪುರಸ್ಕಾರ್ ವಾಂಟುನ್ ಬರೆಂ ಮಾಗ್ಲೆಂ.
